【Dry得太耐】周秀娜撞口撞面余德丞 朋友關係進化
蘋果日報 2019/09/29 16:33
鄰居周秀娜余德丞
周秀娜、柏天男、劉明軒今午在尖沙嘴出席時尚平台DELUXE成立兩周年活動，到場分享及參與工作坊。
娜姐成為現今時尚女性，分享工作經驗，她坦言：「工作經驗雖然唔係太多，入咗娛樂圈10年，但會用自己心態去分享自己開心同正面態度。」娜姐近日和好友彭秀慧時常傾女人經，在對方身上獲益良多，二人合作過電影《29+1》之後沒有真正聚會傾談更新近況，近日二人分享感情生活、工作、健身美容等女性話題。
娜姐和小鮮肉余德丞傳出緋聞，娜姐否認並表示仍然單身，她說：「我哋係朋友關係，進一步發展就係鄰居關係。」被指主媾掂余德丞，娜姐笑言：「係啦，都唔知點解，好搞笑，個古仔寫得幾好，第日我想搵題材拍嘢時可以參考吓，得啖笑。不過我遇到自己鍾意嘅人會主動出擊，但呢件事只當古仔咁睇，佢係一個好男仔。」
娜姐否定發展可能性，還說：「我哋真係朋友，好好鄰居，唔存在愛情之意，亦都冇諗過，大家識嘅時候就係住埋同一棟大廈，撞口撞面見到打招呼。」近日感情食白果，娜姐表示會努力覓得真命天子，又笑說：「我好多嘢都可以分享，除咗冇感情生活之外，我身邊所有人都好緊張我感情事，係咪我dry得滯呢。」
栢天男則透露剛完成一部電影，接住會開拍電視劇，從沒想過自己如此繁忙，同時要跟私人教練操肌，令日常生活時間行程緊密，柏天男說：「原來我身上仲有好多部份可以解鎖，教練話我胸部同肩膊唔夠大，男士最緊要呢樣嘢，要有一個可以倚靠肩膀畀人枕吓，跟教練後開始有成果，冇肌肉嘅地方都開始突起。」
此外，柏天男之前和羅家英、譚耀文合作拍攝電影，被家英哥風趣幽默一面吸引，經常忍唔住笑被導演鬧，所以每逢同場要十分專注打緊精神。
攝影：仇志德
周秀娜今日分享工作經驗，她說會用自己心態去分享自己開心同正面。
娜姐最近與彭秀慧時常傾女人經，話題圍繞感情生活、工作、健身美容等女性話題。
被指主動追余德丞，娜姐否認，只是並說因為住得近，經常見面。
栢天男亦有出席同日活動，他剛完成電影拍攝，之後會拍電視劇。
最近跟私人教練操肌，栢天男被指胸部和肩膊不夠大。