陳寶珠同梅雪詩主演嘅《再世紅梅記》，今日喺中環舉行慈善記招，到場嘅除咗有楊千嬅之外，仲有林建岳同王幼倫代表領賢基金到場，而仙姐白雪仙就因為感冒，所以未能出席支持愛徒。

千嬅講笑言要帶媽媽同奶奶捧場，佢仲話好難買飛，自己都撲緊飛；千嬅又直言對粵劇有興趣：「試過同古巨基、張敬軒做過，企喺度都要有風範，鍾意睇大戲啲衫同功架。」

之後話囝囝Torres有音樂天份：「佢0依家聽緊BrunoMars嘅歌，我唔喺度時，就睇我啲MV頂住先，佢0依家識唱兒歌《Bingo》。」

另外，寶珠姐講到同梅雪詩今次合作，師傅白雪仙有幫佢哋操練，寶珠姐話：「師傅日日都嚟教導，唔會鬧，師傅係冇得比較，冇人可以代替師傅演出，自己會盡力投入角色，咀嚼每句曲詞，師傅提我哋要有感情。」

此外，千嬅老公丁子高喺微博貼咗張抱起囝囝Torres照片，丁子高仲抱得好高添，佢仲話：「見到他，怎麼樣的煩惱都得拋諸腦後了！」