當年今日

英倫心聲:全球𥄫實曼聯食鵝 - 蘋果波神

蘋果日報 2013/05/12 00:00


巨人費Sir突退下來,魔迷憂心,敵人竊喜;其實來季英超會否變天,無人能預知,呢刻抽水無謂,專注尾2、3輪比賽等收爐再算。魔兵自提早封王後,hea踢多時,變天在即加上老人家專登喺上周中公佈季後榮休,似要為今場賽後捧盃派對喺奧脫福威到盡,決捧曼聯大炒「天鵝」史雲斯望搭到順風車。
季尾波因各地形勢幾已大定,精采賽事唔多,連一向競爭激烈嘅英超都多咗悶波;可幸阿Sir震撼性宣佈退休,英超又聚焦全球視線。若能好似我哋嘅記者碰巧得到越洋採訪大新聞機會,又能第一時間向讀者呈上,不論過程遇到多大困難,作為一個專業記者,實是佢個人嘅福氣。原本無關痛癢嘅「曼、史」戰也變成今晚英超十分矚目嘅尾門大戰。
史雲斯自2月尾捧走英聯盃後,因目標已達如洩氣皮球,之後僅頭尾贏過兩場;前幾天喺一致看淡下,殘陣反勝韋根,只因對手自亂陣腳,其實發揮非常一般。來自以色列嘅後備箭頭舒捷達今屆上陣機會少,擔正見未能融合,正選門將禾姆又喺該役撞傷,料續缺陣;王牌射手米捷提早收爐,只見成隊波嘅西班牙式地面推進欠暢順兼多埋尾斷纜。若曼聯肯多派主力兼用心踢,史雲斯今戰難逃大敗,做紅魔賽後派對嘅最美味主菜。曼聯其實喺上月初被車仔喺英足盃淘汰出局後,由於聯賽封王在望,大部份比賽嘅發揮一般,鬥強隊負曼城、車仔及和阿仙奴非關實力,係鬥心減弱;今役全球注視,球星們又要報答阿Sir,唔會hea得過天鵝啩?講hea波,新特蘭迎修咸頓值得博和,兩支下游隊多取1分已令周二作客阿仙奴嘅尾3韋根好難反先;英超唔似意西季尾多協議球,但形勢使然,為保來季幾億元收入,今場好難叫兩家鬥攻。
唔淨止阿Sir退休將英超變天,香港嘅英超直播權又快易手,玩死嘅肯定係我哋呢類死忠英超球迷,改嫁又改嫁;「現在」台既sales已不斷致電舊客戶,游說我哋加錢睇下屆高清英超,月費去至400幾蚊續簽兩年,自恃有王牌體育節目,議價空間勸大家唔好有太大幻想;最慘係𠵱家嘅638同639台,下月頭都cut埋,以後原本僅剩嘅二線波荷甲同蘇超直播,凍過水咯。
大做水平及收視唔高嘅本地波,卻除英、西外,全cut世界各地足球直播賽事,球迷付高昂月費,但睇波空間卻越變狹隘,香港球迷好易變成球壇井底蛙,去到明夏世界盃還以為各國球星喺石頭爆出嚟。呢種播波策略,猶如無記淨係識翻炒再翻炒舊橋,諗住收得圖食老本,以為大家一定照單全收;時代巨輪走得快卻視而不見,「金枝2」收視慘淡,怪不得誰;我阿媽都唔睇啦。(下次見報日期:19/5)文:蘋果波神