民主黨立法會議員許智峯涉搶女EO手機一事鬧得滿城風雨，更被警方拘捕，面臨檢控。原來，立法會示威區日前都曾經發生許智峯事件翻版。市民劉先生向《蘋果》指，上星期參與反對一地兩檢集會時，被建制陣營嘅示威者搶去手機，佢之後報警，點知警方就以手機已歸還為由拒絕處理，令佢極度不滿，大鬧「歸還就唔使處理係雙重標準！」

劉先生話呀，當日參與反對一地兩檢集會時，被傅振中陣營人士搶去手機，佢提供嘅片段可見，雙方發生衝突，有女示威者除鞋打人，反對與支持兩個陣營人士口角，劉先生一直拍攝當時情況。直至片末，有個女人突然問：「影咩呀你，影咩你」，正在拍片嘅劉先生即時大喊「搶人電話？」之後鏡頭一黑。

劉先生話事後同證人一齊報警，但警方就話呢位女士已經交還手機，又無人受傷，所以不作處理，佢覺得警方處理手法有問題，以許智峯事件為例指，許智峯都向女EO歸還手機，一樣被檢控。