【韓流】輪住宣傳品牌!李聖經大馬冧粉絲 朴敘俊19號襲港做店長
朴敘俊李聖經
現年27歲嘅韓劇《舉重妖精金福珠》女星李聖經,近年擔任護膚品牌LANEIGE嘅代言人,去年亦曾來港為品牌宣傳。噚日佢就到馬來西亞出席品牌發佈會及晚宴,吸引數百粉絲4到場支持,而李聖經亦大談扮靚心得。
李聖經出穿晚宴前,先於晏晝現身發佈會同粉絲見面,而李聖經亦相當親民,大派心心及揮手,而佢亦趁機宣傳於6月首播嘅新劇《About Time》及新片《Love Sling》,叫粉絲多多支持。隨後李聖經換上閃亮白裙現身,大晒高挑身形及優雅氣質。今次已經係李聖經第二次到訪馬來西亞,佢表示經常喺Instagram見到粉絲留言鼓勵佢,好感激粉絲,所以都好希望可以多啲機會周遊各地,與粉絲見面。
提到護膚化妝心得,李聖經就推薦方便攜帶嘅BB Cushion,並稱最重要係為肌膚做好保濕嘅工作。李聖經又指:「我認為女仔唔應只著眼於要遮住所有瑕疵,咁就好似將自己唔好嘅嘢無限放大咗,反而我覺得應該將自己最真實嘅一面自信地表現出嚟。」雖然李聖經今次嘅行程相當緊湊,李聖經只現身晚宴10分鐘就要趕返韓國工作,不過佢亦有貼心地為3位現場貴賓送上禮物。
另外,憑熱播劇《三流之路》而人氣急升嘅男星朴敘俊,早前被LANEIGE選為新嘅品牌代言人,而佢將於本月19號襲港,現身品牌於旺角開設嘅限定Café,同粉絲甜蜜互動。
更多韓流,喺晒《娛果》
http://fb.com/appledailyent