滙豐控股（005）今年似乎冇乜運行，除咗業績表現唔多好，一度諗過全球凍薪又凍唔成，股價又不斷尋底，就連大摩都幫手吹一吹「摩笛」，畀咗全城最低嘅目標價：28蚊，仲低過當年「海嘯價」30.5蚊，噚日滙控即刻又跌多啲，46蚊不保。

半數列車叫滙豐號

滙控呢期如此運滯，似乎連中環總行門外一對銅獅子，都擋唔住呢陣強勁煞氣，所以一班高層都要搵啲新嘢沖喜一下，喺推廣宣傳方面毫不手軟。
除咗一般大型banner廣告，滙控新近搞搞新意思，贊助咗中國廣深列車「和諧號」，拎咗冠名權，將11架來往廣州東站至羅湖站嘅列車變為「滙豐號」，佔廣深列車總數一半，又話準備精采嘅資訊節目喺車入面播放，等更多商務旅客知道滙豐品牌。
雖然滙控話，冠名列車叫做「滙豐號」，不過佢個大名只係擺喺列車側面，車前「和諧號」三隻大字，仍然會存在，睇落就算畀幾多錢冠名，都唔能夠取代「和諧」。而佢哋亦冇披露贊助費或年期，可能怕金額太大，講出嚟變成公關災難啩。
滙控只係講明，之後會着重投資珠三角地區，咁啱銀行最近唔畀政治人物黃之鋒與周庭開戶口，唔知有冇關係呢？唉，北上內地發展「被和諧是常識吧」，明白嘅，即管睇佢做咁多嘢能否挽救股價喇。

李華華
mailto:[email protected]