42歲香港桌球一哥傅家俊（Marco)，由十幾歲的神奇小子，變成神奇中年，今年更升格為神奇導師，開設全球第一間兒童桌球學院，教小至三歲小朋友打桌球，寓桌球於教育。「響我嘅桌球生涯，好多教練幫助咗我好多，覺得自己有責任去同大家share。」

傅家俊創辦的新學院位於港島東，趕在父親節前開幕。傅家俊和兩個女兒Belle（包包）和Amelia（米米）一齊出動做訪問，太太陳建瑩（Shirley）就幕後打點，三父女埋枱打波，傅家俊大女包包打得有板有眼，細女米米則眼神銳利，「好好玩，爸爸鐘意所以我都鐘意。」

【桌球中學習逆境自強】
「如果單講做教練，我諗我十幾年前已經諗，嗰時係諗做正規教成年人，2012年有咗小朋友之後，就想將桌球教識我嘅嘢，分享畀小朋友，所以設計了一啲課程。」桌球帶給傅家俊精彩人生，他開設兒童桌球學院，由不同導師教授不同課程，希望兒童透過學習桌球提升專注力、ＥＱ等，「希望小朋友學到，好似情緒管理，面對逆境失敗，你點樣處理呢，再簡單啲，好似手眼協調、數數學、認顏色，到科學、物理， 哦，原來個波向前係咁樣行嘅，後漩，原來白波嘅反應又會唔同咗咁。」

Marco六、七歲在電視上看到戴維斯對基夫斯比賽，愛上桌球，由父親引領下成為桌球手，十多歲勇奪「全港桌球公開賽」冠軍，一鳴驚人； 2007年格蘭披治賽拿下第一個職業冠軍。開設學院教小朋友，特製只有80cm 高的兒童球枱，加入腳台，令細至三歲的小朋友都可以學，因他腦海還有另一個想法：將學桌球的年齡再推前，「其它運動，好似Tennis、踢波，兩三歲可以開始學，呢一點，桌球係比較蝕底，因為桌球枱高度限制，一般係七八歲先學打，我自己都是八、九歲先開始打波。其實十六歲就可以轉職業球手，如果你三、四歲已經可以打，好個基本工嘅，到一路成長，可能到十歲，你就可以打嗰啲正式嘅基本桌球枱，成件事就可以推前。」

【慈父不會鬧女】
Marco在加拿大長大，婚後和太太Shirley一直在英國生活，方便Marco在英國比賽，連兩個女兒都在倫敦出生。 2016年傅家俊為令女兒能好好學中文，毅然舉家回流返港定居。周日就是父親節，兩個女已畫定父親節卡，三父女之間互動非常溫馨，等埋位時玩叠手會數英文生字，女兒非常黐爸爸，又攬又錫。

「以前成日要飛，一年可能有一半時間唔響佢地身邊，好多生日、學校好多活動都miss咗，囡囡係一月生日，好多同學都係 一月出世嘅，一齊搞生日會好開心，我自己都好想去，但一月好多比賽，所以都沒辨法。」 他慶幸重要時刻，如女兒學行、講話、大女畢業禮等，都沒有錯過，見証她們成長。因疫情關係，傅家俊減少出外打比賽，造就過去半年可以留港，父女感情更加密切，傅家俊講桌球認真嚴謹，談到女兒就總忍不住咀角笑，明顯是Yes Daddy，永不say no， 「鬧女呢啲粗重嘢，留番俾媽咪啦，我盡量唔鬧，一個嚴啲，一個鬆啲咁，佢地都知我係負責陪佢地玩嘅。有時我可能惡少少，佢地就會喊，佢地講到明，我係唔可以鬧佢地嘅。」

他在父親引領下成為球手，但不會強迫女兒學打波，也不會強求她們成為運動員，「有響屋企教下佢地，佢地又幾鐘意喎，同埋算上手上得快。兩個性格唔同，姐姐比較內歛、比較規距，打唔入，姐姐會再擺過、 再打；細女就活啲， 可能就咁拎支cue篤，或者用手撥入去囉。」除了打波，父女間和平常人一樣，「踩單車、 行吓山，都好滿足。」

【1500呎兒童班】
傅家俊的「大師桌球學院」（Master Snooker Kingdom）開在港島東區，1500呎面積間成三間房，放置3呎X6呎的兒童桌球枱，室內燈光明亮、枱椅七彩，牆上貼滿clever、interesting等鼓勵字句，完全是兒童教育中心風，絕非桌球室格局。至於可否指定傅家俊教導？「我都仲要打比賽，所以好難指定時間上堂，但一有時間，我都會去學院教吓。」

採訪：林妙萍
攝影：郭賢興
攝錄：林德雄
剪片：輝

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新