曾蔭權取得足夠提名票，是不必問風水佬都知的既定事實，李永達和詹培忠連陪跑都無機會，八百個選委唔肯做大騷，其實是好事，省到不少燈油火蠟，冷氣都會開少幾個禮拜，對環境有益無害。曾蔭權最好提早宣布自動當選，大家好辦事，除了環保省電，其他好處多多，例如：
一、曾特首開始坐番一哥專車，不會預先張揚落區探街坊，小市民不用做政治人肉布景板，街坊可以着番街坊裝做番小市民。
二、政治飯局相應大減，官商紅人食少幾斤魚翅，鯊魚活命率高些，寄望海洋生態會回復平衡。

三、當勞曾自動當選，辯論舌戰慳番，沒有論壇，火藥味減到最低，心火唔盛，醫生都睇少幾勻，應該冇咁易成為配錯藥的受害者。
四、曾Sir已經做硬特首，八百個選委不必逐個跳出來肉麻表態，扮端午糭，影響市民已經夠滯的胃口。
五、沒法跟李永達和詹培忠直接拗手瓜，擂台打不成，對外國觀眾來講是好事，免得外國人以為香港男人的平均高度全部都係曾、李、詹的水平，誤會香港回歸後，已經無「高人」指點江山。
六、潮流興單一招標嘛，曾蔭權有闊佬捐款擲錢助選，擺明就是一件人肉西九項目，輿論還用爭拗文化抑或地產重要麼？還是慳番啖氣，一條心飲你杯新界北水，流你的珠三角血。