人氣新股叙福樓（1978），同創業板上市嘅駿碼科技（8490），噚日齊齊掛牌，兩股各自有名人撐場，搞到上市儀式星光熠熠。先講叙福樓，有近期「霸氣王」港鐵（066）主席馬時亨。
馬時亨噚日以私人身份現身，皆因佢係叙福樓的股東之一，投資咗800萬，以叙福樓首掛高位2.12元計，賬面身家一度添742萬，以收市價1.54元計，賬面仍賺320萬。

視乎股價再增持

之前投資元氣賺咗好多錢嘅馬時亨話，今次投資800萬「好少錢箒！」投資最重要係「可持續發展」，心情幾靚嘅佢仲笑笑口話，以後沽貨或增持要視乎叙福樓股價表現，又大讚管理層管理有道。不過一提到港鐵就急急腳走人，可能因為見近排天氣持續酷熱啩！
至於駿碼科技亦唔輸蝕，有憑《反黑》「小黑」一角爆紅的台灣影星柯有倫，專登飄洋過海嚟香港撐駿碼主席周博軒。柯有倫自爆，佢同周博軒喺美國讀書時已經相識，至今有廿年。
查實駿碼同演藝界關係幾密切，創辦人周振基係香港演藝學院校董會主席，之前公司上市記招仲有「歌神」張學友拍片祝賀。除咗有明星，駿碼喺商界都有好多朋友，除咗做埋股東嘅「小巴大王」馬亞木，連行會成員陳智思都罕有現身。

李華華
mailto:[email protected]