阿仙奴「險簽大軍」粒粒皆星就係人都知，點知原來連領隊雲格最擅長嘅簽幼齒都會變「險簽」？據英國《BBC》同《天空體育》等報道，愛華頓鍊贏阿仙奴同韋斯咸，將會以680萬鎊（約6,800萬港元）買斷合約，由比利時甲組球會奧伊本收購20歲尼日利亞前鋒安耶古魯（Henry Onyekuru）。呢位新晉「超霸鷹」國腳去季攻入22球並列比甲神射手，但佢因為未符合英國工作證條件，來季將會留喺比甲外借班霸安德列治。

其實上述兩間媒體喺5月底明明報道過阿仙奴已經同奧伊本達成轉會協議，但據報安耶古魯為咗更多上陣機會唔想一步登天，所以拒絕槍手邀請，而且呢位小將已經喺instagram上載自己喺葛迪遜公園「打卡」相，似乎呢單交易冇走雞囉。有支持阿仙奴嘅網民就忿忿不平，表示愛隊竟然俾對手遲來先上岸，真係「世界級」轉會操作。