清明節，政治新聞悶過鬼，難得亞視李彤姐身在斐濟，同埋鳳凰衞視記者，有天大面子訪問到溫總，講完邊緣化又講中港兩地經濟發展，香港記者梗係執到寶，猛咁炒。
八方心諗，究竟點解港人最鍾意嘅溫總咁大細超，淨係畀政協常委棋哥同劉長樂旗下嘅兩間電視台做訪問，六叔嘅無綫同吳光正嘅有線都唔預？唔通學煲呔有親疏之別？
原來呢鋪唔關溫總事，而係無記同有線為咗留番啲彈藥做胡主席外訪，今次無派記者採訪，點知竟然執輸收場。當然，大家都唔可以睇少彤姐嘅魅力，佢曾經畀前總理朱鎔基同副主席曾慶紅點過名噃，人氣梗係急升，好多內地單位都因而畀幾分面佢，所以今次有咁嘅安排，佢阿姐唔多唔少都要記一功。彤姐同總理格外有緣，冇得恨㗎啦。

傳真︰2623-9278
電郵︰[email protected]