諾記手機抄足DC　千分一秒快門　追住影

蘋果日報 2006/08/14 00:00

玩開滑水嘅朋友同我講，畀八嚿水學一堂其實唔貴，弊在想留低倩影同班Friend威吓，咁就有難度！無他，拎部單鏡DC落快艇未免太笨重，影相手機又未夠級數，好無奈；不過，諾記就啱啱推出咗首部內置機械快門（MechanicalShutter）嘅N73，佢優勝在快門速度達千分一秒咁高速，而且仲搭上320萬像素蔡司鏡頭，用手機捕捉滑水一刻，再擺埋個靚甫士，都可一「嚓」不留鬼影！
記者：陳國輝　攝影：楊錦文
玩家級以上嘅DC搭配機械快門好常見，但講到手機都內置呢項分唇，則相當罕見！簡單嚟講，機械快門係針對高速移動或昏暗嘅環境而設計，好處係能捕捉主體嘅清晰度，避免因手震導致出現殘影，相質唔會跌Watt。諾記視N73為06重頭戲之一，除發布會當晚運送咗一架快艇嚟突顯身價，更邀請郭富城同李嘉欣親臨撐場，加埋來賓及百位電子傳媒，場面勁墟冚！
empty
■機面採用象牙白及少量鏡面設計，靚過傳統直身機好多。
小記喺現場拍咗張試相，其實機械快門唔只針對移動物件，連室內暗位曝光都有幫助。成幅相唔見有鬼影及鬆邊問題，線條清楚實淨，色彩就符合現場環境，稍為偏藍，但勢估唔到冇乜雜訊，抵讚！
empty
機械快門測試
高低3D喇叭唱雙簧
大部份Ｎ系機已內置立體聲喇叭，除咗師兄N91大玩4GB高容量抄歌兼勁靚CD封套式播放介面，數到第二音樂強者，睇怕要輪到N73！佢特別在機頂及機底部份，各安裝咗一隻喇叭，當啓動3DSound之後，嗰種聲音就好似喺你耳仔左右兩邊走咁，感覺非常真實；音樂格式方面，支援大路嘅MP3、AAC、AAC+、eAAC+以及WMA，若配合eAAC+及最高2GBminiSD卡，更可儲存達2,184首歌，簡直搭幾程長途機都夠晒用！稍為唔夠方便，只係卡槽位要畀啲指甲慢慢撬佢出嚟，換卡會有些少麻煩，若然本身已經用緊張2GB卡，相信就唔使面對呢個煩惱！
empty
■機頂嗰排圓孔形設計其實係立體聲喇叭，機底都有一隻。
empty
■機面30萬像素相機，支援3G視像通話。
empty
■插卡位雖然有塊蓋保護，但換卡嗰陣好難先撬到出嚟。
320萬像素撼K800i
講到影相手機，近期絕對唔少得最Hit嘅索愛K800i！N73同佢嘅規格都幾似，同樣係3G直身機，並配搭320萬像素鏡頭、自動變焦；唔同嘅係，K800i挾自家SONYCyberShot之名而戰，無論影相介面抑或操作，都係用家玩慣玩熟嗰隻，好易上手；至於N73則繼上一款N90以後，第2回同德國名廠蔡司CrossOver，兩者同樣有強勁後台，要比拼實在難分勝負！
不過實際試玩，個人認為K800i稍佔優！道理好簡單，影相當然質素行先，但反應、速度亦好重要，自從SE推出K750i以及W800i之後，嗰種高速對焦、快門反應以及親切介面，早成玩家至愛；相反N73喺呢方面明顯輸蝕，小記現場試影Model，對焦至按快門足足花咗7秒，靚女仲以為小記唔識用㖭！
empty
■橫度影相嗰陣，利用上下方向以及兩邊分唇掣，即可輕鬆操作拍攝。
empty
■機側設對焦及快門掣，仲可一按入相簿。
empty
■影相嗰陣會見到機械快門活動。
empty
■N73採用2.4"芒，比K800i更闊，作為ViewFinder當然適合啲啦！
empty
■機背見K800i有兩盞閃燈，而且備XenonFlash，應付夜景佢比較拿手！
現場花絮
empty
■記者會類似NightParty形式，「照例」遲45分鐘開始。
empty
■當晚李嘉欣件晚裝中門大開，搶晒舞王風頭。
empty
■派對一開始即有班Dancer大跳民族舞，打晒觔斗，激！
empty
■除咗N73，發布會當晚仲有一款可換殼藍芽耳機登場。
PROFILE
制式：WCDMA/GSM四頻
體積：110×49×19mm
重量：116g
屏幕：26萬色QVGA芒
主要功能：320萬像素蔡司鏡頭、機械快門、20×數碼變焦、微距拍攝、miniSD記憶卡
查詢：Nokia（21366338）
empty
■個人較鍾意Sharp啲嘅橙紅色，因為另一隻深灰色都幾常見。