全季跑88次賽事，馬季長達十個月，歇暑時間並不算多。開鑼至今跑了三次賽事，可能因為馬匹休息時間不長，不少上季尾表現見好的馬，勇態得以延續至今季，如「四季旺」、「歐洲巨星」及「一道」皆完成跨季孖寶。

後晚（13日）快活谷賽事，出戰第七場三班1200米的「翡翠劇院」上季尾初跑谷草即勝，反映其谷草性能特佳，續由贏馬配搭李寶利，有力承接氣勢跨季連捷。

上季6月14日晚谷戰，文廐一對「翡翠」系馬「翡翠福星」及「翡翠劇院」同晚勝出，文家良今次又部署同系兩駒分頭出擊，希望可以重溫美夢。

四歲澳洲自購馬「翡翠劇院」，上季來港經過三場熱身後開始上名，當中最後一役轉戰谷草1200米，在歐洲好手李寶利胯下守住四、五位跑，入直路從外叠望空即長驅直進，力壓同程專家「超好玩」爆出22倍冷W開齋，而且締速1分09秒42屬三班上佳水準。

「翡翠劇院」上季三歲在港跑第六仗已識贏，展望今季轉四歲必有上升水位，後晚季內初出即攻贏馬路程谷草1200米，賽前由李寶利一手操好兼試埋大閘，抽到第2檔相當好跑，贏馬機會仍樂觀。