巴西日前成為首支透過外圍賽鎖定2018俄羅斯世界盃決賽周席位嘅球隊，狀態咁「弗」，利物浦孖寶菲臘比古天奴同羅拔圖法明奴當然有功勞，佢哋亦早早乘坐球會包機歸隊，備戰今晚英超早場對愛華頓嘅「默西賽德郡打吡」。領隊高路普喺賽前記招仲自爆，巴西教練堤迪不但派員向佢「取經」，仲話希望巴西踢法似利物浦喎。

高路普表示：「堤迪顯然鍾意我哋嘅風格，我哋亦有唔少聯絡。雖然我唔係100%肯定，但我認為佢想踢出相似嘅足球。」高路普又表示巴西而家一樣安排法明奴打「9號位」，呢個佈陣同時激活埋古天奴，相當奏效咁話，最緊要係兩人歸隊後冇乜疲態，今晚可以全力搏殺！