啟晴邨喺鉛水風波越搞越大鑊,令到揭發呢件事嘅民主黨九龍西立法會議員黃碧雲亦人氣急升。八方聽聞唔少政圈中人好想知,到底人稱一嚿雲嘅黃碧雲,點解突然咁醒神?係咪有人提水叫佢抽水?黃碧雲自我解謎,話忽發奇想而有此作為。
黃碧雲喺7月初已經開記者會,話驗過啟晴邨啲水發覺有問題,當時政府死撐冇超標,同一嚿雲同區嘅民建聯立法會議員蔣麗芸卻質疑抽驗唔準確,事實卻還黃碧雲一個清白。
曾經因為喺議會投票撳錯掣而被諷稱「一嚿雲」嘅黃碧雲向八方笑稱,其實2012年入咗立法會後,佢被安排專責食物安全事宜,當時佢冇發夢反而忽發奇想,覺得食物可以驗,水質都一樣得,有人繼而建議驗住宅嘅食水,因為好多喉管都係大陸來貨,係咪聽到都巧京京!
結果黃碧雲以九西樓宇為網絡,連貴價樓如擎天半島都驗過統統冇事,惟獨啟晴邨出事。雖然一驗成名,但佢冇忘本,話要多謝大學教授同水質專家肯幫手就真。