雖然「成功靠父幹」，但係足球壇就未必，事關星二代好多時發展都唔係太好，不過丹尼爾馬甸尼就有可能打破呢個慣例，事關佢啱啱幫AC米蘭贏咗今屆意甲U16冠軍，原來佢阿爺施薩馬甸尼、老豆馬甸尼都捧過呢個盃。

意甲U16周五就上演決賽，由AC米蘭對羅馬，過程都幾一面倒，AC以5:2大勝，AC 10號仔丹尼爾馬甸尼仲攻入一粒。講番呢個丹尼爾就大有來頭，佢係前AC隊長馬甸尼個第二仔，不過唔似得老豆踢左閘，佢就出任進攻中場同前鋒。原來馬甸尼都幫AC贏呢個錦標，之後上埋一隊成就一代球星；連阿爺施薩馬甸尼都贏過，真係三代都幫AC打江山。15歲嘅丹尼爾其實仲有個阿哥，叫基斯甸馬甸尼，不過發展就一般啲，雖然都係出身AC青訓，宜家只效力意丁嘅塞斯托。