57歲嘅香港電視主席王維基同49歲香港總商會總裁女友袁莎妮，今年10月入紙申請註冊結婚，今個月11號袁莎妮同王維基一齊出席香港總商會聖誕party時，袁莎妮好開心咁透露已經同王維基簽咗紙，叫大家以後可以叫佢王太，但就唔肯講係邊一日結婚。

袁莎妮當日話只係好簡單咁簽個紙，然後一家人去食飯，因為唔想煩到大家喎。而王維基當晚喺party自爆求婚過程好困難，話自己喺飛機上邊打電話同喺地面嘅袁莎妮求婚，傾咗足足90分鐘，佢笑言話:「係一個超貴嘅求婚電話。」

原來王維基同老婆日前已經飛咗去外地度蜜月同享受白色聖誕，相當浪漫，前日袁莎妮喺facebook貼咗一張同王維基滑雪嘅相，留言話:「Happy Boxing Day！」

據《蘋果》了解，王維基同太太去咗日本度蜜月同滑雪，聽講王維基結婚之後成個唔同晒，冇以前咁工作狂，之前佢就算放假都照返公司做嘢，搏晒命唔肯休息，但自從結婚之後，佢會放假陪老婆。袁莎妮上個月5號49歲生日，佢喺facebook貼咗一張估計用成百枝粉紅玫瑰花砌成嘅心心相，留言話:「Celebrating my 49th birthday」聽講啲玫瑰花係王維基所送，估唔到王維基份人咁浪漫呢！

精選娛聞，喺晒《娛果》
http://fb.com/appledailyent