當年今日

海外車訊:
快意Punto新版更誘人

蘋果日報 2003/05/25 00:00


雖然快意(Fiat)汽車已有一段日子未有新車到港,但廠方仍在世界各地市場推出不少新產品,如Stilo及Multipla就是最佳例證;而備受車迷注目的新版Punto車系,廠方亦已公布有關細節,新車每個地方都散發着一陣誘人魅力。不如今日一起來先睹為快,看看新車有何吸引之處。

記者:鄭達基
三門五門任君選
為切合不同用家需要,新版Punto仍備有三門及五門型號供選擇,加上嬌小玲瓏嘅車體,穿梭於繁華鬧市中嘅大街小巷都絕不成問題,而且泊車時重好方便,駕駛者完全唔使「左顧右盼」,便可將車子泊好㖭!然而,新車響外觀上亦有不少改動,如用上全新泵把、新款頭燈組合、15吋合金胎軨,以及新設計嘅鬼面罩等等,全都令新車造型望落更富吸引力,相信定能惹來不少年輕車迷垂青呢!
車廂闊落設備齊全
除外形略有改動之餘,快意廠方響設計新版Punto時,亦有照顧到乘客所要求嘅闊落空間感;故此,新車依舊保留原有型號嘅闊落車廂空間,加上承托力十足嘅座椅,乘坐可謂既貼服又舒適。設備配搭亦見齊全,除有高級CD連MP3音響外,重有原廠恒溫冷氣、泊車感應裝置同埋雨點感應開關水撥等等,設備配搭可謂一應俱全,使用時亦見方便。
引擎配搭選擇多
廠方特別為選擇新版Punto嘅用家,提供有多台引擎作選擇,當中包括有1.2公升(60或80匹)、1.4公升(95匹)及1.8公升(130匹)等型號,而且重不乏有柴油Turbo型號;佢哋除咗有慳油好力嘅特性外,重有低廢氣排放嘅好處㖭!另外,新車亦備有多項電子設備(如ABS、ESP、ASR及MSR等等),除可有助增強行車安全性外,一套先進嘅HillHolder裝置,重方便駕駛者於斜坡上起步㖭!