噚晚平安夜，楊千嬅就喺紅館開第2場「三二一GO！楊千嬅演唱會」，第二晚，千嬅已經換咗3套全新靚造型出場，同大家一齊迎接聖誕。

好多觀眾都諗住平安夜，一定會同千嬅倒數迎接聖誕啦，當千嬅問大家平安夜想點玩？全場大叫「唱到12點」！千嬅說：「係喎，冇諗住平安夜倒數添，冇向紅館申請呀，你哋買31號張飛嘛，咁就一齊倒數！」

千嬅唱《可惜我是水瓶座》時，就換咗一個新造型出出場，佢話：「我希望大家都做到自己嘅理想、願望達成、搵到喜歡嘅人同佢表白…今日有冇人係識咗新朋友買飛帶佢嚟睇，想發展吓㗎？好多男女睇我演唱會搞掂咗，我助手都係睇我演唱會識咗佢老公，結婚生仔，好旺㗎！」台下有人大叫「有」，千嬅即興奮問佢係咪演唱會其間成功表白，佢答「係」，千嬅就笑說：「我唱咗2個鐘咋喎，就變咗男女朋友？我啲歌真係好勁！」

另外，千嬅仲喺演唱會上傳授老公丁子高減壓秘方，佢話：「我以前好介意人哋講我乜乜物物，依家唔介意，因為咁即係有人關心和留意我，就算嗰啲說話令我好嬲、好忟憎，都值得珍惜！以前我好執著，後來被我先生（丁子高）薰陶，但我慧根領悟唔到！例如今次搞演唱會前期好緊張，某日有啲嘢唔順利搞到我好忟，丁生叫我坐低，冷靜吓！」跟住佢就模仿丁子高慢慢咁話：「合埋對眼、深呼吸，諗住你個腳板底（全場爆笑）由腳趾感受當下，連接身體，由腳趾到腳板底，上小腿到大腿……」千嬅說：「佢(丁生)由腳趾講到個腦，足足講咗15分鐘，其實我當時仲係好嬲好忟，但冇再講，因為我知我再講只會更嚴重。雖然我冇成功連接到我身體，但丁生成功咁連埋我把口！你哋都可以試吓，原來呢種『冤』都可以增進感情！」全場爆笑。

更多娛聞，喺晒《娛果》
http://fb.com/appledailyent