【新增圖片】

外號盃王的大摩，今季請咗澳洲鄉里貝湯美做主帥，少咗用其他騎師。但今日賽前，大摩、雷神季內零合作，卻始終極唔尋常，畢竟兩人過往攜手贏過大大小小唔少賽事。近日雷神接受西報訪問，亦坦言自己不太擅長處理和一些練馬師的人事關係。

直至這天（17日）沙田跑日馬，貝湯美繼續停賽，雷神同大摩終「破冰」，是彼此今季賽日首度有馬合作。全日合作兩駒，並憑第五場三班草地1200米「得勝駒」爆冷得手，此駒在港初出即贏，單Win及組合獨贏A2分別派133.5及35元。

呢次所謂摩、雷「破冰」，由今日第三場「凱旋之星」開始，該駒是兩人今季首匹合作馬，於泥地短途大熱包尾，以為「破冰」冇料到之際，第五場輪到「得勝駒」出場，亦係騎練全日最後一駒合作。

結果「得勝駒」呢匹三歲新西蘭自購馬冇令幕後失望，在港初出於雷神胯下從第4檔起步，沿途居中前位置，直路加速輕取1.8倍大熱新勝馬「君達星」，贏1.75馬位，爆13倍Win在港一出即勝。

「得勝駒」是馬主李永泰首匹個人名下馬，本身來港前澳洲三戰全跑位置未贏過，今次真真正正打破齋缽，亦成為大摩與雷神季內首匹合作頭馬。

第五場開出冷頭熱腳，二至四名依次為「君達星」、「競駿天驕」及「確威風」，四重彩派5,293元。