保育意識高漲,加上對本土的感情,令老店的去留,愈來愈受重視。有小店後繼無人,或是捱不過貴租和城市發展,也有老店幸運地得以承傳,1893年由駱公和所創的公和荳品廠,正是一例,也是黃詠珊筆下的其中一間老店。同樣愛藝術的第四代接班人蘇意霞,直言喜歡黃的圖像紀錄,正計畫合作搞搞新意思,除在小店內舉行社區畫展,亦將以crossover形式,推出紀念品,為老店注入新元素,與時並進。
「我兩年幾前先返嚟幫手,見到有張水彩畫掛咗喺度,覺得好靚,老豆話係個女仔畫,一直想聯絡,但又無留底電話,幾個星期前見到佢,自己帶咗張摺櫈,好靜咁坐咗喺門口畫畫,先發現大家都係城大校友,好好傾。」蘇意霞說。上年米芝蓮首設街頭小食店欄目,公和是獲推介的小店之一,百年老號,裝潢沒大變動,依舊是紙皮石牆身和地板,抬頭可看見吊扇與古舊時鐘,也不時見到遊客慕名光顧。
「深水埗係我細個一家嘅蒲點,老豆去鴨記(鴨寮街),媽咪就去公和買荳品」。這天,黃詠珊就帶着她的新作《老店風情畫》來到小店送給蘇氏父女紀念。「每次,都好期待睇佢哋嘅反應,好希望佢哋會鍾意,覺得開心」。除此以外,小妮子亦計畫與深水埗明哥合作,為新開的社企食店「北河同行」的巨型拉閘畫畫。「對於社區工作,我仍然係初哥,但會多方面嘗試。」