梁朝偉同老婆劉嘉玲近日被指同澤東電影老闆王家衛不和，仲話佢哋唔想續約澤東，又話因為王家衛部電影《一代宗師》開極都開唔成，拖咗成6、7年咁耐，不過𠵱家部戲終於開拍有期，馮仁昭收到風話明年農曆新年後就開工。
噚日馮仁昭將呢個消息問番澤東方面，發言人梁小姐好大方咁話：「係呀，過咗年先開。」梁小姐強調梁朝偉同劉嘉玲與澤東仲有經理人合約，不過兩個人嘅簽約年期唔同，劉嘉玲係比偉仔遲啲簽約。
至於《一代宗師》呢部戲係講李小龍師傅葉問嘅傳奇一生，梁朝偉飾演葉問。為咗拍呢部戲，偉仔付出唔少精神同時間，因為佢喺幾年前已經向葉問個仔葉準拜師學詠春拳，不過其間偉仔接拍咗其他電影，所以未能繼續學拳。

特登谷肥啲

𠵱家偉仔完成晒手頭上嘅工作，終於可以學番詠春，因為佢想由基本功學起，之後再學正式嘅詠春拳。偉仔𠵱家練得一身肌肉，仲手瓜起𦟌，之前偉仔俾人話肥咗，其實佢係特登谷肥啲，因為要有肌肉就先要有肥肉，咁先至可以練靚啲個身形。偉仔除咗開始練功，又舉啞鈴健身，佢覺得形態要似先夠投入，佢仲想練到六嚿腹肌㖭！