【星光黯淡】傳多名演員缺席大鐘獎 全智賢黃政民落實唔到
大鐘獎全智賢黃政民
一年一度嘅韓國影壇盛事「第53屆大鐘獎頒獎禮」將於下周二舉行,不過由於大會於上屆舉行前宣佈「唔到冇獎」政策,受到網民抨擊,導致去年星光黯淡,9位入圍爭影帝影后嘅演員一致缺席,包括女神全智賢、韓孝珠、劉亞仁、黃政民等人。雖然上屆頒獎禮於爭議聲中完結,但頒獎禮嘅公平性已經受到質疑。
雖然今年有唔少好嘅作品入圍,不過似乎今年同樣都係星光黯淡,事關去年獲頒影帝影后嘅黃政民同全智賢,理應成為今屆嘅宣傳大使並於下周二頒獎禮舉行當日現身任頒獎嘉賓,不過今日兩人就齊齊宣佈唔會出席「第53屆大鐘獎頒獎禮」。全智賢方面表示因為要趕拍《藍海傳說》而冇法抽身,而黃政民方面表示因為有拍攝日程而無法出席。
另外,根據《日間體育》報道,有份爭影后嘅裴斗娜、沈恩京以及爭男配角嘅李璟榮都唔會出席「第53屆大鐘獎頒獎禮」,裴斗娜方面表示頒獎禮當日裴斗娜唔喺韓國,而沈恩京、李璟榮亦稱當日有拍攝日程所以無法出席。
對於多名藝人缺席「第53屆大鐘獎頒獎禮」,大會方面僅表示:「演員調整行程中,並非缺席。」又指今年同去年嘅情況唔一樣,今年係因為場地、日期決定得好匆忙,所以演員一時間難以抽身,需要調整行程。