1月6號王宗堯同歐錦棠主演嘅舞台劇《科學怪人》就會喺上環文娛中心公演，兩個主角為咗演出都好落力，飾演科學怪人嘅歐錦棠仲自費去英國10日，跟阿根廷嘅演藝女導師學習形體動作。

歐錦棠今次上咗四堂，每次三個鐘，歐錦棠話：「呢一世都難忘，因為直落三個鐘頭，老師冇要求休息，佢鍾意一氣呵成。未試過上完第一堂，我即刻標入廁所嘔，好耐未試過練嘢練到嘔，同體能無關，原來練形體係精神負苛重過體能好多。」而喺英國上堂以外嘅時間，歐錦棠主要都係跑步同去健身室玩gym，o依家爆晒肌爆晒筋好有霸氣。

王宗堯大讚歐錦棠嘅付出，佢話：「棠哥認為我哋必須用自己嘅方式將作品呈現，令觀眾覺得唔會欺場。我哋要用自己嘅方法去做，就要用『攞命搏』嘅精神，亦係香港電影最核心價值。棠哥要喺七分鐘內由有意識、學唞氣、肌肉發展到企得起身，令觀眾覺得佢演得好犀利，好震撼！」