資深演員劉丹嘅寶貝仔劉愷威，喺無綫幾年捱極唔紅，外闖又撈極唔起，前途一片黯淡，難怪最近跳槽亞視一博，要同當家小生陳啟泰爭做亞視一哥。
為慶祝加盟亞視，早幾日劉愷威喺三個鐘內連踩兩場、先後約會三名女伴，展開黑夜連環𠝹，反而舊年被拍到同佢拖手行街嘅顏思穎胞姊Regine就未見出現。

猛講電話

當晚八點零鐘，戴cap帽、着便裝嘅劉愷威，先同一名身穿白色超窄T恤嘅長髮中女喺中環蘇豪區一間餐廳撐枱腳，但中女飲紅酒飲到情緒高漲，成晚講唔停，仲笑到好冧，劉愷威就大多時候陪笑，間唔中又講吓電話，似乎好趕時間，結果佢哋坐咗成九十分鐘，至由劉愷威做柴可夫，揸Audi送中女到跑馬地後，再嗱嗱臨飛車到時代廣場，泊車後直標到食通天趕下場。
原來劉愷威趕到氣咳，係因為約咗另外兩位長髮女伴孖咇撐枱腳，佢喺食通天逗留個幾鐘，到晚上十一點幾至帶兩女攞車，但三人愈行距離愈遠，行到車旁至黐番埋，之後又由劉愷威載兩女極速離場，話時話吖，要三個鐘招呼三女，劉愷威都分身有術啫。
Textby關仁