《阿寶與阿Webb》唔係一齣長篇電視劇，但點都算係中篇劇，上集喺年三十晚（6號）播出，內容講股壇長毛DavidWebb死性不改，又再撩人，今次對象係東亞銀行（023）主席李國寶。

趁東亞記招贈興

嘈乜？咪又係嘈道瓊斯公司內幕交易單案囉，寶哥哥竟然畀錢和解，搞到疑團更深，阿Webb於是喺自己網站上面，質疑寶哥哥係咪仲適合擔任東亞高職同埋其他公職。下集？今日傍晚6點大結局，「咁啱」今日下晝東亞開記招公佈全年業績，呢集壓軸戲應該有啲睇頭！
下集內容預告，話說阿Webb喺6號唔單止鋪篇文上網，仲搞咗個網上調查，叫網友投票寶哥哥應唔應該辭去（1）行政會議成員；（2）銀行界嘅立法會代表；（3）東亞主席同CEO職位？話就話睇吓網民意見，明眼人都覺得，阿Webb似乎想「挾網友以令寶哥哥落台」囉。
投票結果要今晚先知，不過，噚日截稿前嘅數據相信離事實不遠，投票嘅網友已超過1000人次，最多人贊成寶哥哥應該辭去行政會議成員，有1062人，佔93.2%；不足一成人話唔應該（見圖）。正如阿Webb話齋，行會成員接觸到港府機密，同埋市場價格等敏感資料，所以誠信好緊要，偏偏呢單嘢寶哥哥就失咗誠信，難怪冇人撐。

九成網民促辭職

另外，有1014人（89.2%）認為寶哥哥唔應該再做立法會代表。至於話東亞主席及CEO呢兩個位，雖然東亞喺大年初一已發過通告，力撐老細完全有能力繼續履行主席及行政總裁職責，董事會亦全力支持佢咁話，但仍有716人，即六成七網友贊成佢辭職，只得三成幾人覺得可以留任。

早有牙齒印

股壇長毛同寶哥哥早喺05年已經交過手……

05阻增發新股

劇情係咁嘅，阿Webb一直反對上市公司發行20%新股嘅一般授權做法，要求學英國人咁，將上限降到唔多過5%；而新股價格嘅折讓，亦唔應該超過5%。之後佢四出呼籲投資者同基金公司支持（又係用群眾力量呢招），仲命名呢個做「殭屍行動」。
阿Webb推行殭屍行動兩年後，喺05年東亞股東大會上初嘗甜頭，有54.48%嘅東亞小股東，否決咗授權董事會，增發20%新股嘅一般授權動議。
雖然阿Webb話自己冇做過乜嘢，但佢辛苦咗兩年，見到有成績出現，都忍唔住要講句：「令人鼓舞嘅結果」。

電郵：mailto:[email protected]