【劉榮業專訪】鬧爆本地球圈 「足總高層只顧出風頭」
柬埔寨曾志偉香港足球修頓阿仔劉榮業
【新增影片】
劉榮業球員時代是本地球壇其中一位最出色華人攻擊球員,期間獲得不少榮譽及讚賞,但他以有名無利來形容在香港當職業球員,如選擇足球員這條路,苦練是唯一改善球技的方法,因為足球是工多藝熟的運動。
「仔哥」同意足球帶給他很多,包括讚賞、名氣,還有友情,但在香港當足球員並不會發達,而球員退役後投身社會亦不容易,他說:「在足球圈捱過,故從不鼓勵兒子踢波;好似我踢到30幾歲掛靴,重新投入社會有困難,但要搵食冇辦法,仲試過行差踏錯過,香港對運動員的保護工作做得不夠好。」據報,「仔哥」曾因行使假信用卡而被捕,但最後因證據不足而獲撤罪。
「仔哥」退役後便淡出球圈,但仍偶爾留意本地足球,而他形容:「球員拎住個波似炸彈,有波在腳是嗱嗱聲交畀隊友;難聽啲講,現在球員攞腳波都瀨屎瀨尿,因為冇技術,點踢甲組呀?如要歸咎,足總要負責,高層只顧出風頭,唔搞好啲青訓,冇做好培訓工作,亦冇後着,太多嘢只諗短線,不想長線,當然現在搞青訓是比較難,因太多娛樂,多咗手機,青年人在球場時間自然減少。」
香港足球沒有好前景,難要求父母讓兒子投身追逐足球夢,但劉榮業認為,只要肯努力仍可在這行賺得名氣,他說:「我侏儒身材都踢到,證明只要肯下苦工便有機會。當年有愉園球員同我講,話我呢種身形踢唔起,搵份工作好過啦;我份人好好鬥志,日操夜操,現在兩隻腳都主力腳,出道不久便入選港隊,踢過三屆世盃外,當中兩屆小組出線,呢個紀錄暫無人能破。」他勸勉現役球員多些訓練,以免磋跎歲月,到27、8歲仍沒成就,到時再想重新投入社會工作便有難度。