台灣天團五月天噚晚舉行桃園站演唱會尾場，搵咗周杰倫同台，當五月天喺大雨滂沱嘅戶外唱《你不是真正的快樂》同《聽見下雨的聲音》時，周杰倫忽然由升降台驚喜現身合唱，歌迷興奮到喪叫。周董就搞笑稱：「好開心唷，你們（指歌迷）是真正的快樂嗎？終於可以站上五月天的舞台耶。」阿信笑言：「大家是不是真的開心我不確定，但我確定大家都聽見下雨的聲音。」

周杰倫喺台上指，聽說之前JJ要加入，想組「六月天」，不過貴為天王嘅周杰倫講笑指自己唔稀罕，又話好多人都講過「六月天、七月天」之類，佢自薦乾脆組一隊叫「周五」，可以周一唱到周五，之後佢同阿信唱《雙截棍》，兩人即場狂fing雙截棍，玩到將雙截棍掉咗去觀眾席，周杰倫唱完後，直接走落台，阿信就明知故問：「杰倫他怎麼突然不見了。」瑪莎就搞笑咁講：「他在走星光大道。」目送周董離去，瑪莎仲叫「董仔謝謝」，阿信更承諾有機會再找到更厲害嘅嘉賓，但係邊個呢，阿信就話秘密唔講得。

據知今次個唱上嘅雙截棍係周董特登準備，仲一次準備咗五份，要俾五月天驚喜。五月天11場喺桃園棒球場嘅個唱去到最終場，瑪莎見到冒雨睇騷嘅歌迷，忽然好感性咁講：「今天是在桃園這個棒球場演出的最後一個夜晚，可惜天公沒有作美，看著大家（指歌迷）心裡覺得五月天何德何能，冒雨看演唱會穿著雨衣的大家，看我們演出給我們掌聲，玩得很high好不好。」

怪獸稱終於嚟到最後一場：「已經在這很多天，已經有感情了，真的很感謝這陣子大家的，沒想到今天除了下雨，還有大風，這不是用嗨不嗨來形容，這是非常搖滾的一刻。」阿信喺風雨中撐著雨傘：「下雨我不怕，風我會怕，因鬢角會被吹亂。」之後佢哋應景合唱《一支小雨傘》、《雨眠》，唱到一半一度雨停，再清唱《聽見下雨的聲音》，答謝歌迷。

演唱會最後，阿信感性咁講：「雨滴在你們（歌迷）身上，就像打在五月天身上，真的很心疼……現場的每一位，都是五月天心中的英雄。」聽到呢一句，台下不少歌迷感動流淚，2.4萬位歌迷高舉雙手比出5嘅手勢，阿信提醒歌迷，「如果可以回家放個熱水澡，如果沒人幫忙放熱水，瑪莎、冠佑可以代勞……總之不要感冒了」。五月天最終平排向歌迷鞠躬，點知歌迷仲係唔願走，着上雨褸嘅五月天又再次上台encore唱《相信》、五月天同歌迷揮手道別，個騷晚間10點10分完場。