民建聯「元秋」蔣麗芸同人民力量「大嚿」陳偉業，前日喺特首答問大會休會互轟後，兩人噚日朝早仲未下到氣，咁啱兩人坐埋一枱食早餐，結果喺班議員面前上演「元秋V.S.大嚿」Round 2！
話說元秋同八方講，開頭同大嚿同枱，佢都「好有風度咁樣食我嘅粥」，同枱嘅自由黨張宇人、民建聯陳恒鑌、葛佩帆等梗係唔出聲！點知食食吓，有人講番前日罵戰，元秋即時扯火開拖，警告大嚿咪再講佢爸爸：「大嚿，我𠵱家好鄭重警告你，你以後講乜嘢都好，你講我蔣麗芸冇問題，但唔好搬我屋企人出嚟，假如你搬我屋企人出嚟，我就搬番你屋企人出嚟！」據元秋講，席間大嚿澄清並無侮辱佢老竇，所以「既然佢都已澄清，我都原諒佢，希望佢下不為例」。對於噚日聲言知道大嚿太太同女嘅事，元秋就話：「佢（大嚿）知我知道佢啲嘢，但我唔會去講。」

不過大嚿對呢場「元秋V.S.大嚿」Round 2，就講咗另一個版本。佢話噚日朝早自己食粥，同張宇人傾偈期間，元秋突然坐埋嚟，佢就當對方完全透明，一句嘢都冇同元秋講嘢，全程只見元秋自言自語。大嚿又好㷫元秋提及佢老婆同個女嘅言論，認為係不能接受，「叫佢（元秋）唔好成日發花癲啦」。大嚿又話，兩人噚日立法會撞到都當對方透明，認為蔣麗芸父親是公眾人物，有人評論唔奇，佢亦沒有侮辱佢老竇，只係鬧元秋喎。睇嚟兩人要修補關係，仲有排先得！

李八方
mailto:[email protected]