電訊盈科出新招，先遣散「網絡客戶服務管理部」嘅三千名員工，然後再由一間附屬公司聘用番，你估聘用之時，薪金會調高、調低或不變呢？大家都識得計數，心照不宣啦。
呢間附屬公司叫做萃鋒（英文名Cascade），引起才女L嘅注意。才女L對文字好敏感，佢對左丁山講：「唓，個英文名乜咁唔好意頭呀，cascade照字典解釋，就係小瀑布，從急斜嘅山峯衝落呢，陸谷孫《英漢大詞典》有一句例句，就係themoneysheearnedcascadedaway（她賺的錢滾滾流失），cascade雖有氣勢澎湃之意，總不免係一瀉而注，江河日下。

唉，咁嘅公司名，點會吉利㗎。另外，電盈嘅營運總裁麥柏喬個名幾好吖，但睇西報先知道佢叫做MichaelButcher，呢個名得人驚噃。」才女L本來不問世事，為人純真到極，估唔到為呢件事特登打電話嚟猛咁講。唔怪得外國大機構為附屬公司取名，要搵專業顧問公司做各類語言嘅發音與語義研究，以求冇諧音或語言冒犯或不吉利嘅意思。
之不過，大家都要在通縮時期慳錢、慳成本，好難面面俱圓、照顧周到咯。譬如沙田陳師奶鬼殺咁嘈，皆因沙田禾輋邨嘅「中國聯合銀行」分行冇咗好耐，最近滙豐又關掉禾輋分行，禾輋商場內嘅存戶要去到新城市廣場先至可以存錢，好唔方便。冇分行，咪用ATM囉，以後要有teller服侍，可能要另加服務費㖭。