1995年11月19日，17歲帕爾馬年輕門神保方喺職業生涯處子戰完封當屆意甲冠軍AC米蘭，自此展開傳奇鋼門生涯。轉眼21年有多，喺周五深夜主場迎戰阿爾巴尼亞嘅世盃外，如果保方代表意大利上陣，就會係職業生涯第1,000場！被問及點樣迎接呢個里程碑，保方喺周三記招就笑言：「1,000場當然係莫大嘅榮譽，但我唯一可以肯定嘅係，唔會再有另外1,000場！」

雖然意大利已經有「新保方」基安盧基當拿隆馬隨時候命接班，但39歲嘅保方坦言，對於之前打算2018世盃後退役仍有猶豫：「我要思考一下，睇吓內心感受如何。」佢亦呼籲意軍唔好掉以輕心，皆因阿爾巴尼亞貴為去年歐國盃決賽周分子，絕對唔可以睇小！