最新人口統計顯示，沙田係全港最多人住嘅地區，其實喺廿幾年前，沙田只係一個墟仔，好多地方都仲係爛地一塊，人煙稀少，邊有人估到𠵱家會旺成咁。
沙田蛻變由1980年3月4日，房屋署派人清拆沙田舊墟開始。當時政府計劃將沙田發展為衞星新市鎮，但係沙田舊墟有近100間舖頭仔，小商人同村民因為賠償問題同政府拉鋸唔願搬，最終傾掂數，政府就搵人出動拆晒啲舖。
沙田舊墟被夷為平地，一切由零開始重新起過，鄉村式嘅舖頭仔，變成地產商「金礦」新城市廣場，𠵱家日日人頭湧湧，直情旺過旺角。城門河兩岸萬家燈火，係唔少人嘅安樂窩。