黃子華是觀眾心目中的男神，他與佘詩曼主演下月15日年三十晚上映的賀歲片《棟篤特工》，齊放笑彈。曾被封做「票房毒藥」的子華，今次有信心一雪前恥變回票房靈丹。日前他與阿佘在銅鑼灣接受本報專訪，並在「人人問」中親自解答市民的問題，他笑言如大家要他回水，首要親自入場看《棟》片。有人問子華覺得拍戲還是開棟篤笑可以搵食，他大呻：「拍戲對我嚟講，係搵唔到食嘅。」
採訪：蘇美怡　

伍小姐：你有冇信心今次會甩到「票房毒藥」呢個名？
子華：我就不厭其煩解釋一次，電影係有命運㗎！同人嘅命運一樣，所以唔好理，總之做好自己。

鄧小姐：鍾意拍戲定係棟篤笑多啲？
子華：咁又真係好坦白同你講啲內心說話，拍戲對我嚟講呢，係搵唔到食嘅， 咁我都做，你話我幾鍾意做呢樣嘢。咁寫呢個戲又寫咗兩年，大佬，好陰公啊拍戲，唔好喊啊！

黃先生：一係唔拍戲，一拍就賀歲片，怕唔怕觀眾又嗌「回水」？
子華：嗱！一定要入場，唔入場冇得嗌回水，喺係街嗌嗰啲唔當係回水㗎。

李先生：係咪專登度個古仔畀自己做男主角，仲要係型嗰隻？
子華：你誤解晒，呢套戲係一啲都唔型仔，你入到戲院就知道呢係幾咁折墮。
阿佘：唔係啊，我覺得。
子華：今時今日，折墮都畀人話係型啦！

莫先生：子華神，可唔可以講句金句嚟聽吓？
子華：哥哥，可唔可以畀啲錢嚟使吓？我搵食㗎。

林小姐：我想問吓，今次套戲有冇滿足觀眾要求除褲呢？
阿佘：嘩！你有曾經咁樣提過咩？
子華：嗱，呢個真係絕對滿足到你喇，喺套戲裏面，唔單止除褲咁簡單，係除咗好多嘢。

吳小姐：你心目中嘅一代笑匠係邊個？
子華：咁首先許冠文啦，跟住當然就係周星馳啦，喺我哋香港……
阿佘：梗係黃子華啦！
子華：我只係一代嘅男神啫，我係唔屬於笑匠。

黃小姐：我想問幾時再開棟篤笑？
子華：你睇完《棟篤特工》，我就會話你知㗎啦。
阿佘：最重要係可以攞到幾多張飛？
子華：睇下一條題目啊。
阿佘：次次問親你都話冇飛。

廖先生：Poster上面條腿係咪真係你（佘詩曼）嚟㗎？
阿佘：我條腿梗係靚好多啦，邊有咁黑啊？其實點解你（黃子華）唔搵我影番呢？
子華：講真我係未見過你條腿係點㗎喎。

黃先生：阿佘覺得子華戲外係咪都鍾意搞gag？
阿佘：我覺得佢係幾幽默嘅人，同埋唔發脾氣。
子華：我係大局為重嘅人嚟嘛。

姚先生：阿佘覺得最型嘅男演員係邊個？
阿佘：梗係發哥啦！
子華：我都同意。
阿佘：你係第二型。
子華：嘩，已經好褒獎。啊！黃發華！
阿佘：哈哈，唔該你啦！

場地提供：Papi of Fashion Walk
化妝：Judy Cheung、江中平
髮型：Helen of Fifth Salon、Seiko of Hair Culture