「為咗梁振英可以去到幾盡？」花生友呢排同政界中人吹水，個個都係講CY辣手換走曾德成同鄧國威嘅事，一如立法會主席曾鈺成所講，呢個突然其來換馬嘅舉動令人太心寒，有政界中人話，官場人人自危，點知下一個係咪輪到自己？而齊齊剝花生之際，花生友發現唔少政界中人都對事件有一個幾一致嘅睇法：教育局局長吳克儉認真好運，咁都避過一劫！
事實又係喎，如果論工作表現，花生友都聽過政界中人讚曾德成做民政好上心，唔少青年活動都肯出席，同下屬又會有偈傾，證明都有啲嘢想做。
至於鄧國威，就算話佢同公務員團體關係麻麻都好啦，政府內部都有唔少人話佢算係好好先生，而且都唔係唔做嘢，總之論hea嘅程度，肯定唔會喺局長之中排包尾。