事隔幾年，郭炳聯脫罪兼夾梁振英落台，郭家終於大翻身，除咗郭炳聯獲任全國政協，郭家第三代郭基煇同郭基泓，分別係廣東省同北京市政協，即係南北通吃之餘仲要直達天庭，喺娥特治下可謂吐氣揚眉。新地喺去年特首選舉力挺林鄭，集團公共事務總監李鑾輝仲任林鄭助選團主將，唔知呢場大仗喺阿爺心目中，有冇分加？
新地喺政協換屆大豐收，但另一個地產商相信有啲失落。新世界主席鄭家純同九倉前主席吳光正，都因為年齡問題要卸任全國政協常委，通常呢啲國家任務，大家都好想子承父業，但似乎唔係個個都得。八方聽聞，吳光正囝囝吳宗權榜上有名成為新丁，但鄭家純公子鄭志剛卻未能爭到一席位，香港呢五大地產商家族中，由於長和系有李澤鉅、恒地有李家傑，換言之只有新世界喺全國政協特邀港區名單，冇第二三代做代表。
吖，當年純官轉投梁營，新世界好多範疇都有餅仔分，梁下林鄭上全國政協都要缺席。據知胡應湘囝囝、合和董事總經理胡文新都成為全國政協委員港區新貴。
李八方