莊思敏和周子揚聯同地產界合作，今日到肺炎疫區西灣河派發合共2500個 口罩 及500支消毒液給街坊，現場派發500個籌，早已有幾百街坊排長龍。

物資由周子揚與不同業界籌集，以炒價買入口罩及消毒液，希望幫助社區長者， 莊思敏則落力做義工派發。莊思敏表示之前曾為不同機構籌集口罩，中間卻被高價騎劫，而她暫時存貨還有一盒口罩在家，無奈地說：「惟有少啲出街。」

今年正是莊思敏和台灣男朋友第一年過情人節，但因疫症影響相隔兩地，莊思敏說：「我個幾星期前喺台灣返嚟 香港 ，情人節各自喺屋企煲劇度過，冇辦法，都明白嘅，連禮物都寄唔到，物流未開工。本身計劃男友飛過嚟香港過情人節，但佢再返台灣要隔離14日影響工作，所以打消念頭。」

疫情 對莊思敏工作大受影響，她說：「2、3月新年春茗、結婚司儀工作全部取消，春茗唔會返轉頭，只能下年見，有啲人婚都冇得結住好慘，統計過損失有六位數。 」之前她和友人合資點心食肆已經退股，新東主接手後3個月便執笠，她覺得慶幸：「我好彩，佢唔好彩。」今日到疫區派發口罩，莊思敏做足防備，口罩加手套，她說：「知道有個案發生，所以唔除得口罩，會自己小心，好多區都有案例，冇辦法，少啲出街。」

周子揚今次撲口罩有難度，感謝不同業界幫忙，找到大批貨源後都驚被截劫，更笑指：「近日我都買唔到廁紙，屋企都係得幾卷，自己有嘅口罩存貨都拎咗出嚟幫人，希望啲公公婆婆受惠。」他們揀選小西灣地區正因為社區多老人家，想幫助普羅大眾，今次藝能界和建築行業合作，促進年青新一代可以貢獻社會，未來會再次派發口罩幫助社群。

《果GYM》隨身播 　健身壹App過！