前港姐季軍王愛倫個仔——林建億(Chester)出晒名係花花公子，梗係啦，含住金鎖匙出世當然「識玩識食」。上個月先被《蘋果》影到，孖住兩個外籍女子去睇電音演唱會。

媾女易過食生菜嘅林建億，日前下晝五點幾同一個外籍女子喺銅鑼灣利園現身，佢哋兩個周圍行好似搵緊嘢咁。行行下，林建億突然好似好型有咁除衫，排骨身材表露無遺，但係唔知點解㗎喎，見佢又唔係好大汗，相信都係為咗型嗰下啫（型唔型就見仁見智）。

兩人行行下就入咗超級市場，見佢哋去買麵包；點知林建億好似好肚餓咁，見有任何試食都唔放過，之後買咗支水加個麵包就走人。佢哋兩個表現得好親密，一支水兩份飲，相信關係都非常要好。

離開超級市場後，林建億同個外籍女子行返去利園，相信係佢哋等朋友車。過咗陣朋友架車終於到，林建億就同外籍女子嚟個臨別攬攬，最後就自己單拖走人。