許冠傑日前懶理與張耀榮有關演唱會的爭拗，偕同太太、兒子懷欣和懷谷到加拿大多倫多開騷。大抵因為反應理想關係，阿Sam昨日上午7時許返港時不但笑面迎人，而且更罕有地開腔接受記者訪問，心情勁靚。戴上鴨嘴帽及豹紋頸巾的阿Sam，在兩名助手陪同下步出機場，對於4月演唱會是否如期進行，他說：「應該係，仲要傾，可能會推遲啲，因為時間太緊啦，𠵱家印飛可能趕唔切。」

記者問阿Sam若然開騷的話預計開多少場時，他說：「八場，香港開唔到，咪去美加做巡迴囉！」究竟他現時跟張耀榮是否仍然有偈傾？阿Sam說：「有！」但問到張耀榮的破產官司會否影響二人合作時，阿Sam卻沒有否認：「要了解佢財政狀況，我都想同佢合作嘅。」那麼是否要張耀榮證明財政可靠後才合作？阿Sam想了一會後說：「都係㗎。」最後，記者問阿Sam演唱會如期舉行的話，會否配合做宣傳，他說：「睇吓到時情況點！」看來張耀榮與阿Sam今次合作凍過水。