前日係馬天佑嘅29歲生日，過往生日大多同一班朋友喺派對中度過，佢喺16號由英國返香港，睇完時裝騷，生日嗰日咁啱就搭緊飛機返香港，所以踏入生日一刻喺飛機上度過。

以為馬天佑好慘豬？咁又唔係喎，因為航空公司好窩心，一班機組人員送咗張簽晒名嘅生日卡畀佢，又喺座位前嘅電視打出祝賀說話，搞到馬天佑好感動。

馬天佑喺圈中向來人緣好，加上佢鍾意熱鬧嘅佢，所以生日當日就喺香港搞咗個生日會，以Chuck Bass X Blair Waldorf做主題，每個人都創意十足，打扮得入型入格，壽星仔就一身Chuck bass look官仔骨骨打扮出現。人妻吳雨霏（Kary）都有參加生日會，佢同馬天佑攬頭攬頸嘟嘴嚟影合照。

講到今年嘅生日願望，馬天佑話：「生日願望係希望7月推出嘅新歌會有好成績，因為真係用咗好多時間同心機去做，當中到經歷咗好多挫折先製成，仲希望下半年再多幾首歌。」