成軍12年嘅樂隊Supper Moment終於可以踏上紅館，於11月1&2日舉行兩場《Supper Moment Live 2018》，雖然門票仲未公開發售，但網上已經有炒飛，原價$680貴飛炒到$2,990，SM四子齊聲呼籲：「希望歌迷都經由正式合法途徑買飛，以免受騙。」

早前4子為演唱會拍宣傳海報，由於設計概念係SM開騷玩插水，被歌迷抬起嘅畫面，所以搵咗近百位歌迷參與，拍攝時4子分別瞓喺離地7呎高台上，靠一塊細板支撐背部，再由歌迷舉手團團包圍，CK同阿雞仲要喺高空小板上扮彈結他，Sunny則扮凌空彈起，阿達就高舉鼓棍手舞足蹈，大家都忍唔住笑，當輪到Sunny拍攝時，CK更搞鬼叫歌迷：「摸高啲！」搞到有人幾乎摸到Sunny褲浪位，全場爆笑。

今次能踏上紅館，SM除感激歌迷集氣，更加多謝已故經理人Gary：「佢一定係喺天上面睇住我哋！以前Gary話，我哋去到紅館嗰日就係Miracle大奇蹟日。我哋依家都有Miracle感覺，真係冇諗過可以去到紅館。」

精選娛聞，喺晒《娛果》
http://fb.com/appledailyent