公關小YY在美國留學，返嚟打工之後，逢星期五晚都出外作樂，同朋友食晚飯，地點不拘，茶餐廳可以，Grappas亦得，總之隨意之所之至，食完飯去邊度呢？蘭桂坊囉，冇十一、二點，唔走住㗎，總之揸住杯酒，天南地北，無所不談。同佢一齊去wet嘅就係啲留美回流同學，主要係女仔，後來佢嘅同學珍妮參加番中學舊生會，搵番一班男同學，約齊出嚟玩番一晚，點知全無驚喜。

據小YY講，珍妮啲男同學們自本地不同大學畢業，做咗一兩年工，大家年齡相差好少，點知文化差距就大咯。佢哋成班人食完飯之後，九點零鐘，珍妮興致勃勃，要班大隊上蘭桂坊飲酒，豈料四位男同學你眼望我眼，其中一位阿保羅話：「我哋其實已經約咗幾位男仔去打機，十點鐘喺一間互聯網㗎啡室砌過，唔落吧咯！」珍妮為之氣結，即刻埋單，各自鬆人。
珍妮同小YY就認為香港啲男仔唔知點解，咁鍾意約埋一齊去打機，重係沉迷於中小童境界。珍妮話：「邊有大學畢業之後重掛住打機㗎，活像長不大的孩子，點樣可以向上爬，同成年人競爭，做上一代嘅接班人呢。」怕者人哋心有所屬，唔睬小YY珍妮咋啩？珍妮話：「唔係噃，我後來查過晒，佢哋幾個都冇女朋友嘅，成班男仔行埋，就係要打機！」打機還好，搞機就重氣死呢班女留學生。珍妮卒之與一個自歐洲返嚟嘅華僑學生拖手仔，大家啱傾喎。