香港過去半年唔聽話，喺林鄭帶領下，更為中國添煩添亂。中國面對外憂內困，終於要對香港亮劍了！盛傳今日習大大南下訪濠江，將會公佈將澳門「打造」成金融中心，一旦成事，香港地位不保「被取代」，而中國將成最大贏家！（呵欠～）

事實上，翻查過去幾十年紀錄，中國不時都會向香港發文亮劍！

80年代中期，深圳曾經話要發展金融中心，另外，由於當時深圳太多人用港幣，所以曾研究過會發行自己嘅特區貨幣，去抗衡港元嘅威力！

2009年，國務院正式通過，上海2020年將成國際金融中心，地位更會超越香港！

2010年，深圳前海新區正式成立，提出引入香港的管理體制，建立「特區中的特區」，目標要成為「珠三角曼克頓」哈哈哈

2013年，上海自貿區正式掛牌，仲保證自由貨幣流通，實行政府職能轉變，當時好多市場人士就話：自貿區將來一定可取代香港的國際金融市場地位！到2014年，又落實埋廣東自貿區，之後仲有天津、福建等18個，全部都話要複製香港模式！至近年，再吹埋粵港澳大灣區、8月又講深圳「先行示範區」……

大家有冇發現，講來講去，講咗幾十年，中國想靠自己實力，複製新香港，離不開深圳上海深圳上海深圳上海深圳上海深圳上海深圳上海…澳門算係有新意，但其實要複製嘅一早複製咗啦！

發行深圳特區貨幣喎？中共願意下放權力，由深圳自由發展咩？
上海2020年將成國際金融中心？仲有十幾日就到了。
珠三角曼克頓？特區中的特區？司法都未獨立，自由民主有咩？講咩美國曼克頓？
自貿區？搞掂資本帳開放先算啦！正正因為當局嚴格實施資本管制，早排路透都報過，上海自貿區近乎人去樓空。
至最近，講澳門要做金融中心，連美國商會會長都入唔到境，呢個金融中心最終咪又係淪為假大空式嘅金融中心。

中國一直想複製香港，或者係因為面子問題，「冇理由英國做到我做唔到嘅」，冇錯，你就係做唔到！香港金融業有其獨特優勢，係再講求法治、資訊自由嘅配套；同時香港係對外開放，行嘅係市場經濟，更加冇資本管制；更重要係香港人相信嘅普世價值，係同世界接軌，講嘅係道理，而唔係中國式嘅唯我獨尊。想成為世界認可國際金融中心，唔係你國務院開會做個決定，全中國人拍掌，講一句「我2020要做宇宙中心」就成事！

當然中國過去幾十年，一直推動香港Plan B，陰乾香港目的昭然若揭，盡吸香港資金、人才、技術資源；但當要中國地方政府學香港講法治？佢哋會問，「咁我以後食咩呀？不了。」

雖然「ＸＸ取代香港」，就好似「解放軍入城」、「中國亮劍」一樣，講極都未到，搞到連我都緊張埋；但喺攬炒精神下，如果有一日，香港真係被取代，然後中國用完即棄，都未嘗唔係一件好事，香港人可以喺冇習管情況下自由發揮；但而家睇情況係，就算最終榨乾香港成為棄卒，中國都唔會Leave us alone，反而要逼到所有「真香港人」消失，最終全民臣服為止。

唔想跪，可以點？香港人，今次要繼續企硬！

by千頌C@堆填區
http://fb.com/winbigwok