前新華社高官、現任國務院發展研究中心名下嘅港澳政策研究所所長朱育誠，以「學術」身份，來到香港，會見學術界及政界，收集民情！
朱所長喺呢個時候嚟到，若然可以表現出理性開放態度，同港人溝通，而唔係郁吓就大罵呢個漢奸、嗰個賣國賊，咁無疑會平息吓鄔曾反港集團較早時多次羞辱港人嘅民憤！
特區愛國文革，經已愈嚟愈失控，極左分子窮追猛打，想乘機博亂，有啲就假傳聖旨，有啲就製造中央高層講乜講物嘅謠言，有啲就故作激昂愛國狀，明明樹欲靜，佢偏偏妖風不息，瞓身抱住做打手，玩埋一啲太監政治。其目的就係進一步將香港搞亂，挑撥中央同六百萬港人嘅對立、猜疑，將六百萬人推上與中央對抗嘅火線，呢一小撮亂港分子，都咪話唔陰毒。
各路野心家、陰謀家、極左分子，紛紛爭位狂上，力謀架空特區政府，提早搶班奪權。現時嘅特區，經已出現權力真空狀態，牛鬼蛇神，暴露真面目，邊個最有機會做第三任特首，人物呼之欲出，俾呢亭人一旦坐正，重點會好似阿董咁好忍功，香港重會災難性！