曾演出《有品位的她》、《秘行要員》等韓劇嘅42歲女星吳娜拉，近日孖女星蘇熙靜擔任綜藝節目《Taxi》嘅嘉賓，當中主持人提到兩位女演員嘅共同點係「18年」，引起網民熱議。

主持人指：「蘇熙靜與丈夫拍拖8年後結婚，已經結咗婚10年，所以合共係18年，反而吳娜拉與演員男友金道勳(音譯)拍咗18年拖都仲未結婚。」另一主持人李英子表示曾見過金道勳，大讚對方靚仔，更開玩笑地表示：「已經過咗18年，你都係唔確定嫁唔嫁嘅話，不如你讓畀我喇。」引起爆笑。

吳娜拉亦坦言：「身邊都有唔少人問我點解仲唔結婚，其實我想解釋並唔係有問題、特別事導致我唔嫁，而係我哋大家都太忙，忙到連準備婚禮嘅時間都冇。我一直要工作，冇休息咁滯，佢亦一直努力工作。由成為情侶一刻到依家，時間好似一下子就過去咁，依家我哋關係都好好。」吳娜拉又大讚男友有幽默感，係一個風趣嘅人，並指父母親早已經視男友為女婿，總有一日會結婚。

音樂劇演員出身嘅吳娜拉，因參與音樂劇《明成皇后》嘅演出而與金道勳結緣，兩人一直交往至今，目前金道勳正於YG K Plus娛樂擔任演技講師。