今日較早前八方都分享，走出網絡世界嘅全國政協副主席梁振英，又再借推銷大灣區、創科發展嘅同時翻舊帳，鬧民主派議員拉布拉死過創科局。等到梁振英走咗先出席同一場合嘅特首林鄭月娥都有致辭，之但係佢就話要感謝立法會喎﹗

娥特喺梁振英離開之後無幾耐，就接力出席創科香港基金會嘅活動，繼續大力唱好大灣區、創科發展。相比起梁振英只係炒冷飯或者舉出自己有份促成河套區外，娥特如數家珍般，講起去年9月國家主席習近平親自批示香港嘅創科工作，到今年5月財政部、科技部有新嘅、突破性嘅政策，即係畀香港嘅大學申請中央研發基金，要再數到上個月佢同國務院副總理韓正傾大灣區。

娥特又唔單止畀晒功勞北大人嘅，佢多謝中聯辦副主任譚鐵牛之餘，突然話鋒一轉，話要感謝立法會，因為雖然政府用咗3年半先成立到創科局，但政府亦喺3個月就獲批咗300億元推動創科。嗱，呢啲用內地嘅講法咪就係「好好的話好好說」囉，點解上屆政府用3年半先成立到創科局，現屆政府3個月就攞到錢，大家自己諗吓啦。