日本歌姬安室奈美惠去年宣佈今年9月引退，並舉行亞洲巡迴演唱會與歌迷「道別」，千呼萬喚終於唱到嚟香港，今明兩晚假紅館開騷，歌迷都引頸以待。有好多港日兩地嘅fans一早到場，排隊購買官方演唱會精品，有部份日本fans更加cosplay現身。

23:08 安室唱到晚上11點，佢終於開口講：「多謝大家今日來到睇我演唱會，去年發表會在9月16日引退，我衷心希望大家可以在美好的每一天都能聽到好的音樂，好榮幸能夠在這個地方演出，25年間真的真的很多謝大家！」邊講邊喊，更一度擰轉身，場面感動。現場有廣東話即場翻譯，而上次安室喺深圳場都冇喊。佢一講完就走，完場。

22:49 Encore部份開始。

22:48 安室演唱會尾聲唱出《Do It For Love》一曲，舞台升起展示「25 THANK YOU I LOVE FAN!」的巨型字牌。喺等encore時，歌迷拍手兼唱《NEVER END》等偶像出場。

22:27 唱《Chase the Chance》時，安室喺台上兩邊走，仲走近fans，引嚟fans尖叫歡迎。

22:22 全晚另一個高潮位，安室唱經典大熱作《CAN YOU CELEBRATE？》，全場歌迷大合唱，台上配以夢幻畫面，十分華麗。之後安室換上白色裙仔、長靴唱出《Body Feels Exit》，掀起另一個高潮。

21:59 到《a walk in the park》，台兩邊播出1997及2012年片段，證明安室真係寶刀未老。到一響起《Don’t wanna cry》前奏，歌迷即一齊La La La和唱。

21:48 安室唱早期代表作《TRY ME》、《太陽之SEASON》時，全場high爆，當唱到小室哲哉作品《You're my sunshine》繼續勁舞，但高音部份有點吃力，但比起日前深圳站表現較好。

21:34 唱《Try Me》時，由12名舞蹈員伴舞演出。

21:24 唱《Love Story》時，全場觀眾開手機燈，形成一片星海。安室臨唱完派飛吻。

20:49 安室換粉紅色泰山裝唱《Baby Don't Cry》，同fans親民揮手打招呼，而佢更特登向住山頂大動作咁揮手。

20:37 安室戴上黑色軍帽唱出《Hide & Seek》，到尾聲時閃電換上性感打扮，獻唱《Do Me More》。

20:25 演唱會正式開始，由於要遷就安室舞台，紅館座位封咗2/5面積，安室演唱《Hero》打頭陣。

20:10 場外紀念品相當搶手，其中場刊售罄，毛巾亦有好多人搶購，至於每一站嘅場地限定徽章貼，每個60港元，每人限買5個。至於捧場藝人有蔡卓妍（Sa）、AGA同薛凱琪。

19:42 現場有唔少歌迷特地Cosplay成安室捧場。

19:33 有歌迷自發喺場外派發膠玫瑰，有唔少觀眾去攞；另一邊有小販乘機賣翻版相同T恤，港鐵職員到場驅趕。