【新增羅青浩回應】

拍過《流氓大亨》、《城市故事》、《賭神》嘅羅青浩，最近被網傳死訊，繼曾合作嘅吳啟華代友否認後，噚晚前英皇高層Kitty媽（鄭燕玲）喺社交網貼同羅青浩合照，有圖有真相，證實羅青浩尚在人間！

相中嘅羅青浩面色紅潤，塊面冇以前咁削，精神飽滿，染咗淺棕色頭髮，留了二撇雞。Kitty媽留言：「拍過周星馳嘅戲確實不同，總有人提起的，羅青浩叫咗你啦，上個月先食完飯，無事喎，身體健康，百無禁忌！」

Kitty媽接受《蘋果》電話訪問表示：「好好笑呀！噚晚我同佢講，我特登擺上facebook㗎！佢就話：我估到你啦！我話其實都係喺fb同你報個平安，不如做個訪問先。佢問：做個訪問乜？澄清乜？我咪話：澄清你未死囉！」

Kitty媽話同羅青浩識咗10幾年，經常一齊玩㗎！羅青浩透過Kitty媽短訊回覆：「麻煩你同佢哋講聲：多謝關心啦！已經有兩位好友代證，我已經無話可說了。」

精選娛聞，喺晒《娛果》
http://fb.com/appledailyent