37歲容祖兒(Joey)同41歲劉浩龍(師兄)拍拖5年幾，雖然外界唔太睇好呢段「龍兒戀」，Joey一於戀愛大過天，繼續大方去愛，之不過日前傳出分訊，Joey出席活動又刻意避談男友，話唔好講嗰啲嘢，而師兄亦例牌否認分手，稱只係各有各忙，連日仍多次傳出二人已分開嘅傳聞。

Joey傍晚喺中環出席活動，身穿白色鬆身裙，露出玉背，向在場記者展露甜笑，Joey接受訪問時，話自己心情幾好，問到係唔係放低咗，Joey煞有介事咁講：「你哋講嗰樣嘢，我唔回應，唔會回應。」咁即係分咗手??Joey再次話唔回應好啲，唔想講咁多，唔想之後有咁多新聞，佢解釋：「我一直嘅愛情生活都唔習慣同大家去講，留番俾自己去處理。」

問到o依家嘅感情status係單身定係交往中，Joey笑言：「我嘅status係努力工作中，要多啲時間去工作。」記者問到如果Joey一直唔講，外界會一直覺得佢就係劉浩龍女友，Joey：「我覺得最好所有嘢都唔好講咁多，以我嘅經驗係講唔講大家都會繼續寫，我自己唔講咁多會好啲，多謝大家關心。」

記者追問係唔係佢哋關係未有定案，Joey斬釘截鐵咁講：「我冇特別嘢要補充同交代，自己嚟緊都要錄兩隻碟，又要去台灣同大陸，師兄又要做演唱會，總之我哋互相努力、互相關心，支持大家就最緊要。」