左丁山寫完篇「荒謬反世貿」（十二月十五日），預咗有人鬧，果然如此。一位署名「一個反對不平事的人」來電郵話，「素來鍾意睇你嘅文章，但呢篇《荒謬反世貿》十分令人失望……全球化同自由貿易係時勢所趨，但要藉住反對不斷淘汰同迫死啲無權勢、無十幾億美元撐腰的人而賺錢，你食得安樂，我睇見已反胃。反唔反對到係後話，起碼識得在呢個時候用吓腦思考，之後識得表達不滿，就係有國際視野的人。」

反對不平事，要有熱血，但如何反對，就要用吓腦袋思考。世貿係一個組織，組織裏面有一百四十九個國家，各派代表嚟談判國際貿易秩序問題，為逐步清除貿易障礙，降低關稅而努力。由前身GATT傾起，至今五十幾年，先至達到今日成果，先至敢談判最棘手嘅農業貿易，就係循序漸進嘅結果。談判唔成，談判有謬誤嘅話，罪不在世貿組織，而在既得利益集團唔肯讓步，譬如法國農民堅持補貼，法國政府誓不讓步。歐盟之內，英國主張歐盟廢除補貼，但唔夠法國惡。樂施會以及一般反世貿人士，要反對嘅，就要反法國，直搗黃龍，去巴黎大示威，睇吓法國農民與法國警察有冇香港人，香港警察咁有禮貌，咁克制。退而思其次，反世貿嘅南韓農民與其他人應該帶隊去美國南部種植棉花嘅州分，反對美國津貼棉花。我哋香港冇棉花，冇葡萄，冇養牛業，走嚟香港反世貿，純係示威做騷，法國、美國貿易代表見到慣啦，佢哋開會時點會睬你。
反對世貿，要思考深入，研讀吓經濟書籍，唔好信晒新左派，腦袋不脫社會主義思想呢類文化人。講經濟，你唔去睇科技大學經濟系兩位名家鄭國漢，雷鼎鳴嘅論述世貿文章，反而去睇梁文道，許寶強之言，咁樣嘅話，有禽流感打到嚟之時，叫記者唔好訪問袁國勇，去訪問蔡子強好咯。