中國消防（445）跌到落02年上市以嚟低位，平得交關，係時候收集。中國消防主打祖國消防設備及消防車產銷，同相關系統施工安裝。齋計1年，中國消防已經累跌超過7成，現價得0.242元，仲低過02年創業板上市配售價0.40元。
同中國消防業務近磅有海灣控股（416）。上年尾，花旗國大孖沙UTC，透過附屬UTFE，向海灣以高達1.9倍P/B水位提全購。中國消防家陣P/B都係講緊得0.43倍，真係殘到爆。再講，中國消防主要股東當中，亦包括咗呢家花旗國上市企業UTC。UTC貴為全球第二大消防生產商，市值高達3530億港銀，中國消防有同一個超級股東背景，又獲呢家大孖沙睇好入股，但同海灣P/B比較，真係一個天一個地。中國消防上番1倍P/B水位，價見0.57元，代表現價要升1.35倍，但到其時，相對海灣P/B，仲有一大截距離。

勵晶現金多炒落後

勵晶太平洋（575）最新NAV約莫0.40元，現價（0.144元）折讓64%，有唔錯嘅折讓墊底。又集團扣埋銀貸同少數股東貸款後，仲揸住淨現金4.04億港銀，勵晶現金牛吸引。再講，對上星期，市場狂炒細價資源或者相關股仔，其中，中國資源開發（661）翻過半番停牌，主打有色金屬貿易及銅陽極板產銷嘅長盈（689），單係星期五，就升咗41%。勵晶郁都未郁過，又有point炒落後。短打博勵晶升20%到0.173元，仲未有耐到NAV水位。
錢雋